MLE: addang para iti pannakapasayaat ti edukasion dagiti ubbing

Salaysay ni Fred Ilac, Jr.

Nabayagen nga awan damagko maipapan ti mapaspasamak iti uneg dagiti pagadalan iti pagiliantayo. Ti ammok, ti wagas a pannakaisursuro dagiti ubbing ket kas met la idi datao ti damona ti timmapog iti elementaria.

Lagiplagipek no dadduma, natarnaw pay laeng dagidi a panawen iti utekko, nupay dandanin gudua ti dekada idi damok a mabaddekan ti uneg ti pagadalan. Iti nalengleng ken nanumo a lugar a nagtaudak, awan pay laeng ti kinder wenno pre K idi datao ti ubbing. Adda ketdi dagiti makuna idi a paspasurot iti grado uno, kaipasanganna ngata iti matawtawag a kinder.

Innem ti tawenko idi nagpilitak a mapan agbasa, adu nga ay-ayo ni nanangko tapno saanak a kumarayo kadagiti mapan ageskuela nga ubbing, ta ammona a saanakto met laeng a maawat. Kurang la ngaruden ti edadko iti rebbengna nga awatenda, basbassitak pay ngem kadagiti ubbing a kapadpadak ti tawenna. Ngem diak ininggaan ni nanangko nga inud-ud-udan, agingga a pinagustuannak a napan dimmatag iti maestra dagiti maikamaysa. Nagpakpakaasi a bay-annak kadi a sumsumrek ta uray ket inton agbayag, maumaakto met laeng.